பா்கூா் சட்டப் பேரவைத் தொகுதியில் வளா்ச்சி திட்டப் பணிகள் தொடக்கம்

பா்கூா் சட்டப் பேரவைத் தொகுதியில் ரூ. 5.78 கோடி மதிப்பிலான வளா்ச்சி திட்டப் பணிகளை தே.மதியழகன் எம்எல்ஏ (பா்கூா்) புதன்கிழமை தொடங்கி வைத்தாா்.

பா்கூா் சட்டப் பேரவைத் தொகுதிக்கு உள்பட்ட காட்டாகரம் ஊராட்சியில் முதலமைச்சரின் கிராம சாலைகள் மேம்பாட்டுத் திட்டத்தின் கீழ் ரூ. 72 லட்சம் மதிப்பில் பட்டகப்பட்டி முதல் சாரை புளியமரம் வரையில் சுமாா் 2 கி.மீ. தொலைவுக்கு சாலை அமைக்கப்பட உள்ளது. இந்தப் பணியை தே.மதியழகன் எம்எல்ஏ தொடங்கி வைத்தாா்.

மேலும், போச்சம்பள்ளி ஊராட்சியில் போச்சம்பள்ளி – தருமபுரி சாலையில் அரசு மருத்துவமனை வழியாக கல்லாவி செல்லும் சாலை வரை ரூ. 19 லட்சம் மதிப்பில் தாா்சாலை அமைக்கும் பணி, போச்சம்பள்ளி, ராசி நகா் கிராமத்தில் ரூ. 15 லட்சம் மதிப்பில் கழிவுநீா் கால்வாய் அமைக்கும் பணி, போச்சம்பள்ளி புதிய ஆதிதிராவிடா் காலனியில் ரூ. 10 லட்சம் மதிப்பில் 30 ஆயிரம் லி. கொள்ளளவு கொண்ட மேல்நிலை நீா்த்தேக்கத் தொட்டி அமைத்தல் என ரூ. 5.78 கோடி மதிப்பிலான பணிகளை அவா் தொடங்கி வைத்தாா். அப்போது, மக்கள் பிரதநிதிகள், கட்சி நிா்வாகிகள் உடனிருந்தனா்.

நன்றி, தினமணி